Madaxweynaha Soomaaliya Xasan Sheekh Maxamuud, Wasiiro ka tirsan Xukuumadda, Xildhibaano iyo saraakiil ayaa maanta ka qeyb galay salaada janaasada ee Meydka Alle ha u naxariistee Abaanduulahii hore ee Ciidamada xoogga dalka

Jen. C/kariin Yuusuf Aadan Dhega-badan oo shalay ku geeriyooday weerarkii Hotel Saxafi.

Meydka Marxuum Dhega-badan ayaa salaadii Janaasada lagula dukaday Masjidka Shuhadaa ee ku yaalla Madaxtooyada Villa Somalia, waxaana Madaxweynaha uu u tacsiyadeeyay qoyskii iyo eheladii uu ka geeriyooday Marxuumka.

Jen. Dhega-Badan ayaa lagu xusuustaa howl galadii ka dhanka ahaa Al-Shabaab ee looga saaray sanadihii 2011 ilaa 2012 magaalada Muqdisho iyo magaalooyinka ku yaalla koofurta Soomaaliya.

Meydka Jen. Dhega-badan ayaa loo duuliyay deegaanka Xeraale ee Gobolka Galgaduud,halkaas oo uu ka dhashay marxuumku.

waxaa Meydkiisa lagu qaaday diyaarad gaar ah oo ka duushay garoonka diyaaradaha Aadan cadde ee magaalada Muqdisho.

Qaar ka mid ah mas’uuliyiintii ka qeyb gashay salaada janaasada ayaa u tacsiyadeeyay qoyskii iyo qaraabadii uu ka baxay Jen. Dhegabadan oo ay sheegeen in lagu xusuusto guulihii ay ka soo hoyeen dagaalada.