Dowladda Turkiga ayaa la filayaa inay bilowga bisha soo socota ee September u soo dirto Somalia ku-dhawaad 400 Askari, kuwaasi oo ka hawl-geli doona Saldhigga Milliteri ee ay Turkiga ka hirgeliyeen magaalladda Muqdisho.

Wargeyska ARAB NEWS ee ka soo baxa Sacuudiga ayaa qoray inay Dowladda Turkiga ka furan doonto Somalia Saldhigii ugu ballaarnaa ee lagu tababarayo Milliteriga, waana Saldhigii ugu horreeyey ee ayTurkiga ka hirgeliyaan dal ka baxsan Baddaha.

Hirgelnta Dhismahaasi ayaa la bilaabay bishii March ee sannadkii 2011-kii, waxaana ku baxday lacag dhan 50 million oo Dollar.

Saldhigaasi oo ku fadhiya masaafo dhan 450 hectares, waxaana wejiga koowaad laga hirgeliyey 3 Dugsi lagu tababaro Milliteriga, Bakhaar iyo Hool weyn oo Jiifka iyo Cuntada.    Waxaa halkii mar lagu tababari karaa Askar tiradoodu dhanb tahay 10,000 Askar ka tirsan Ciiddanka DFS.

Prof. Sedat Aybar, oo ah Agaasimaha Xarunta Cilmi-baarista Afrika ee Jaamacadda Aydin University ee  magaalladda Istanbul oo la hadlay Wargeyska ARAB NEWS ayaa sheegay inay Turkiga door wanaagsan ka qaateen Horumarinta Dalka Somalia

Waxa uu tilmaamay inaysan jirin cabsi ka dhalaan karta Saldhigga Turkiga ka furayso Muqdisho, wuxuuna ku dooday in Muqdisho laga saaray Kooxo uu ugu yeeray Argagixiso, waa sida uu hadalka u dhigay.

Waxa uu intaasi ku daray in Turkiga oo xubin ka ah Isbahaysiga Milliteri ee NATO taxadar kaga jirto  inaysan ku lug yeelanin Dagaalladda lagula jiro Maleyshiyada  Alshabaab, waxayna qaadatay Tallaabo la mid ah Go’aanka Dowladda Maraykanka ee Xaalladda Somalia,

Dhinaca kale, Hasan Ozturk,oo ah Khabiir ku takhasusay Arrimaha Qaaradda Afrika ayaa sheegay in Saldhigga Milliteriga Turkiga ku yaallo meel Istaraatijiyad ah oo aad ugu dhow halka laga galo Gacan-biyoodka Cadmeed oo ku toosan Waqooyiga Muqdisho.

Wuxuuna xusay in Taageeradda Turkiga tahay mid ku faafaysa dalalka Afrika oo ay wax kala qabtaan Horumarinta iyo Tababarida Ciiddankooda.